入行14年僅家明一個角色被熟識，他卻仍然再等機會

《使徒行者2》播出後反應都算好，戲中除了一眾主角出位之外，有一些配角都值得留意，就好像Victor（陳豪飾）的手下飛機——張景淳。

一頭長髮，在劇中以打手形式出場的張景淳，有不少網民話一見到佢就覺得好有陳浩南影子，究竟是否有所參考當年鄭伊健的造型呢？

在接受訪問時，他說：「我都見到好多人都有講似陳浩南，但系的確系無參考過，因為我本身都系長頭髮嘅，咁我拍之前我又唔想剪，就問監製可唔可以keep住呢個髮型。當時我試鏡一個警察角色，但監製話我髮型都系似古惑仔多啲，所以就轉咗做長興頭馬呢個角色。到我第一日造形，佢哋已經預備好曬啲衫，但其實我戲中身邊嘅兄弟都系呢款衫，俾到錯覺大家可能都系因為個髮型。」

不過其實這個造型跟電影《黑社會》入面的張家輝更為相似，除了一樣以皮褸和打手做招徠，連個名都一樣，點解？因為兩套都有葉天成做編劇嘛！

張景淳家境不俗，父母經營飲品代理生意，自幼移民溫哥華。入行十四年，2003年由劉德華所屬的加際唱片公司力捧的男女實力新組合Cheers出道。

後來樂隊解散，張景淳加入無線成為TVBeople的成員之一，同時擔任《東張西望》的外景主持。

之後都是出演一些跑龍套角色，多年來只有一套《天與地》的家明為人所熟識。

家明雖然令Stanley成功令觀眾留下印象，不過大家只就將他變成了家明，真正認識他的人少之有少，Stanley感嘆：「其實以前叫親我嘅十成都系叫家明，而家好少少，可能有4個叫家明，2個叫我個名，其他都仲系唔記得我叫咩名。其實我都有諗過家明究竟系幫咗我，定系幫我定咗型，但系如果唔系家明，我根本無機會爆出。一來我唔系演藝出身，二來其實我私底下唔識爭取，唔識去表現自己，我通常都系坐喺度等，只可以透過角色去等監製留意我，所以覺得家明始終都系幫我多過壓住我。」

《天與地》

演員的生命雖然可以好長時間，但一直都不能上位，會否想過退出？他說：「其實我自己覺得演員真系好被動，好睇你接到啲咩角色，嗰陣接到家明呢個角色系好適合我去做，所有嘢都好符合我當時嘅條件，喺天時地利人和都好嘅情況嚇，的確系做到啲迴響出嚟。之後我一直都有努力，嘗試去做唔同嘅角色，我覺得要等一個好嘅機會，其實每個演員都系等緊呢樣嘢。好似《使徒行者2》同《飛虎極戰》我都系做一個反派嘅角色，都系有動作場面，有打有飛車，我都會試嚇親身上陣，基本上大部分都系自己完成，當中當然都會有受傷，但我都想做好件事。戲入面我未必會有一條故事線，但起碼我出現嗰陣都會有啲動作場面，希望大家會鍾意，見到第二面嘅我，我就系咁樣去進步。」

既然一直都未有所成，留在這裡的原因主要就是一直以來對演戲的執著，那道火在Stanley心中依然燃燒，他說：「我本身唔會覺得一定要去到好成功先可以留喺呢一行，或者留喺呢間公司嘅價值，因為我見個自己偶像祥哥（黎耀祥），佢自己成功嘅時間都系有佢自己嘅timing。所以我覺得每一個人都自己嘅timing，每人都有自己嘅機遇，最緊要自己系咪enjoy緊嗰樣嘢，一日有機會俾我做戲，我都會繼續留喺度。」

老土講句，機會系留俾有準備嘅人，十年磨一劍，可能下一套就會是你當上主角，加油！他的名字叫張景淳。

喜歡這篇文章嗎？立刻分享出去讓更多人知道吧！