搶收視！小方同杜德智重要部位貼到實吳綺莉否認祖名出手助買樓

娛樂 04-06

今日快報

阿嬌哭訴真心男友難尋：我已經找到

為拍攝大陸綜藝節目，曾寶儀帶鍾欣潼（阿嬌）到熊本百年懷石料理店食好嘢，並邀請了日本排名第一的藝伎即場表演，原來這位藝伎已是83歲高齡，表演生涯已長達65年，兩人紛紛稱讚其專業精神，看完表演後阿嬌感悟很深，首次向觀眾坦露心扉：「其實我自己是一個很容易相信別人的人，真心的男朋友很難找，家人也會提醒你，那個人你要小心點。」說得動情，阿嬌忍不住落淚，而當被祝福一定會找到真正的愛情時，阿嬌公開表示：「我已經找到了。」

吳綺莉否認祖名出手助買樓

藝員吳綺莉被女兒卓林控以刑事恐嚇而導致警方介入，之後有關母女二人的傳言滿天飛。今有指吳綺莉入市值千五萬的大坑寓所，幕後推手是成龍兒子房祖名。吳綺莉接受媒體訪問，講到祖名出手助她買樓，又有傳她繼承母親遺產，她即否認說：「痴線！我無需要向大家解釋我嘅經濟，有幾多錢無需要同大家分享，我件TEE著兩日又話我搲撈、間屋住幾大又話我忽然富貴！我究竟要著咩衫，屋要幾大，做份乜嘢工先啱呢？我依家好忙要去處理屋企嘅事！」

除了入市買樓，更有指吳綺莉允許女兒卓林在與朋友聚會時食煙及飲威士忌，指她管教有問題，她說：「依家大人聚會、啲酒擺曬喺度，咁我哋母女去參與，唔通叫佢食香口膠咩！佢依家已經咁大，就算唔系同媽咪一齊，佢都系選擇自己需要嘅嘢，我系控制唔到。」

搶收視！小方同杜德智重要部位貼到實

藝人方力申（小方）出席「微博之星頒獎禮」，透露跟師傳杜德智在網上做明星愛運動直播，吸引很多人睇，又踢爆說：「有次佢仲差啲成條人魚線扯出嚟，差啲扯曬出嚟，我即刻衝過去遮住佢。」小方又爆有次他在地上做掌上壓，對方就人疊人般趴在他身上：「都有網友話我哋重要部位好貼，所以可能咁樣瀏覽就好高。」他亦謂做了個微博話題是「跟著小方去健身」，近排都少甫了很多做運動的相，因為有歌迷及朋友跟他講甫來甫去都是跟男人做Gym相，睇到好悶，記者叫他找女仔一齊影，他就謂：「邊敢，身家清清白白都咁多緋聞，仲有成五個。」

同場有舊緋聞女友鍾欣潼（阿嬌），小方表示有跟對方傾偈，講到阿嬌謂沒有跟他拍過拖，他即眼眨眨謂：「系呀，咁耐緋聞仲講？（你哋依家兩個單身可以有機會？）唔好
（佢啱曬你嘅條件呀。）我依家凈系想要清靜，想要6舊腹肌。」記者再追問他跟阿嬌可有機會？他謂：「唔講呢啲啦。（叫佢上你嗰個「跟著小方去健身」？）慢慢嚟，有機會。（同佢一齊做運動？）唔講緋聞啦，咁多年前緋聞仲講。」

太太隨時生得　黎諾懿怕血唔敢剪臍帶

藝人黎諾懿、黎耀祥（祥仔）、丁子朗及陳雅思出席節目《嘆得好健康》記者會。黎諾懿透露太太日前產檢，醫生表示未必能夠順產：「BB未跌得夠落，不過磅數各方面都呈現隨時可以出世，老婆同我講要留意電話，一定要見證到囝囝出世嗰刻。我比較怕血，緊張又會手震，到時又要錄像，所以未必敢剪臍帶。」他又指太太日前才拍大肚寫真留念：「佢一直長肚唔長肉，所以近排先真正見肚咋。」

佘詩曼糟質黃子華：好殘忍咁摑佢

藝人佘詩曼出席「微博之星頒獎禮」，表示上年電影《使徒行者》上映，對於電視劇及電影都獲大家支持感到開心，如果內地有想做的工作都想上去。

講到工作，她透露最近忙跟黃子華拍電影《棟篤特工》，估計要拍多一個月，透露兩人在戲中要互相糟質：「佢知我優點、缺點，所以就會用我嘅優點欺負我，而我就用權力去收伏佢。（佢會唔會打你？）冇，反而系我打佢，有幕戲系佢要倒吊，仲要淋水濕身，但我仲要好殘忍咁摑佢一巴，但我唔忍心，嗰日得12度，佢個樣又紅曬，青筋又現曬，所以唔捨得摑落去，但導演話穿崩，變咗佢要再吊多次，跟住子華就叫我「你摑落嚟啦」，我就真系摑落去，但嗰下我覺得好似幾大力，但佢話寧願一take過，所以我寧願畀人摑好過我摑人。」