甜蜜合體！林峯負傷陪女友吳千語健身 7年後生B都OK？黃心穎贊馬國明體力好

娛樂 08-09

今日快報

甜蜜合體！林峯負傷陪女友吳千語健身

現年37歲的林峯與年輕14歲的女友吳千語拍拖五年，經常出雙入對，愛得痴纏。近年林峯長駐內地拍劇搵銀，兩人分隔兩地聚少離多，有指千語BB不甘受冷落及結識到中年富商，今年3月與林峯低調分手。

不過，林峯出名是痴心情長劍，最近透露早前與千語歐遊，否認分手傳聞。又有傳千語BB已進駐林峯位於薄扶林、價值8,000萬的豪宅，據知林峯花了逾一年時間豪裝愛巢，作為將來婚後的「安樂窩」。

日前下午4時許，千語BB與林峯由司機接載，乘坐七人車離開愛巢，直駛灣仔一幢商業大廈外落車，兩人同樣戴上Cap帽，一身運動造型。林峯的右腳腳踭位置貼有彈性運動繃帶，未知是否受腳患影響，他連波鞋都沒有穿好，全程踩踭行，然後上樓到健身室做運動。林峯負傷亦堅持陪女友做Gym，認真廿四孝！

做了兩小時運動後，「峯語」雙雙步出大廈，邊行邊傾，本來穿短褲的千語換上貼身長褲，並拿著名貴手袋，她發現記者拍照即顯得有點害羞，頭耷耷尾隨男友步出，滿面鬚根的林峯則笑笑口跟記者打招呼。兩人步往附近街頭上車，之後齊齊返回林峯愛巢繼續Happy！

杏兒抱袋鼠曬母愛　定欣低胸裙襲沙灘

一班「胡說八道會」成員胡杏兒、黃智雯、胡定欣、胡蓓蔚、李施嬅同姚子羚，最近就飛咗去澳洲拍節目，成班好姊妹可以寓工作於娛樂，梗系要影唔少靚相兼同網友分享佢哋嘅動向啦！

好似今日佢哋就去咗喂袋鼠，杏兒就喺社交網上載咗相，相中見到抱住小袋鼠嘅杏兒一臉慈愛，母愛大發，好似抱緊自己嘅BB一樣，畫面不知幾有愛，難怪網友都留言話杏兒一定好期待BB嘅來臨，咁快就學定抱B嘅手勢呀！

之後杏兒又曬咗張同定欣、胡蓓蔚及姚子羚擺出「

LOVE

」動作嘅相，網友都大讚靚人靚景，好想

join

佢哋一齊欣賞呢個咁靚嘅夕陽呀！

7年後生B都OK？黃心穎贊馬國明體力好

無線藝人黃心穎、朱千雪、麥明詩、陳敏之、狄易達及林頴彤等到科學園出席big big channel親子活動，與大批小朋友同場，心穎表示經常參與兒童活動，自誇深得小朋友歡迎：「我都幾鍾意小朋友，融入到佢哋世界，因為家族多數都系男仔，我比較多同男仔玩。（有咩凼小朋友絕招？）我會千依百順，當自己系個小朋友嘅女友咁，對自己真男友都冇咁好呀！我都覺得湊小朋友幾辛苦，所以要諗清楚，但一定要生嘅。（想幾多歲生？）唔想太老，想同佢多啲一齊玩，希望35歲前，即系七年後啦！」

講到緋聞男友馬國明七年後將50歲，心穎被笑不顧對方感受，她即笑說：「到要考慮嘅時候先考慮啦！佢仲好Fit，體力仲好好丫！（50歲先做爸爸都ok？）呢樣你問佢啦！（覺得佢系咪好爸爸？）相信系呀！佢對屋企人咁好，會將家庭放喺第一位。」

傳改劇本換導演　黎明復出作叫停已返港

自1994年無線劇《阿Sir早晨》後，天王黎明（Leon）闊別公仔箱23年，雖不時有人斟他復出拍劇，但都不為所動，直至早前有「中國版《太陽的後裔》」之稱的內地劇集《莫語者》叩門，Leon終答允出山拍劇。飾演特種部隊成員的他，已在內地開工兩個月，但近日突傳劇組因「配合性問題」而撤換導演，並全面停工，但亦有指Leon對劇本頗有意見，並已率先動身返港，等劇組改好再開工。

對此，Leon所屬經理人公司發言人表示：「Leon尋日返咗香港，為8月11、12日廣州演唱會做準備，劇組仲喺度拍緊。（佢幾時返劇組？）做完演唱會先，確實日期不便透露。（有傳劇組出現配合性問題？）唔關事，系因為個劇多爆破、危險大場面，劇組想精準安排同做好準備。（Leon要改劇本？）唔會，佢接到劇本，話拍就拍，系劇組見到吳京套《戰狼2》故事同《莫語者》相近，所以想改一改。」

做事向來認真、嚴謹的Leon，曾有在中環海濱公園臨開騷前獲告知帳篷布料不符消防安全標準而宣布取消的經驗，但經他施展大公關手腕，最終都能一一化解，相信停工、改劇本都難不到遇強愈強，遇難愈識執生的Leon！

孖女友歐遊擺烏龍　側田遇小粉絲勁感動

歌手側田將於年底再踏紅館開騷，趁未開騷前，他跟圈外女友飛到西班牙旅行，他笑說：「當系騷前輕鬆團。」因為僅得10日時間，他們只是去了馬德里、巴塞隆拿及葡萄牙。第一次到西班牙的側田，看見當地不同類型的建築物，眼界大開，平日不喜歡拍照的他，開心得像小朋友般，不停叫女朋友幫他影相留念。面對歷史悠久的建築物，側田想到不少音樂題材，他正在考慮將這些元素加入個唱中。

此行，最令側田意外的是有一日在街頭，有位中國小女孩走到他面前，問他能否合照留念，側田聽到覺得很出奇問女孩：「你點會識我。」原來該小朋友曾看過他「蒙面歌王」的演出，見過他除面具的真面目，所以認得他，令阿田大為感動得眼濕濕，因為沒想到在外地竟然有人認得自己。

當他與女友在馬德里機場，準備轉飛葡萄牙時，才知擺烏龍，訂錯了機票，他說：「喺機場先知撳錯咗下個月嘅機票，咪焗住返番馬德里留多一個下晝。」最初他打算到唐人街搵按摩店消磨時間，但找不到，因為當地一些店鋪好早閂門，他們走到一間超級巿場，一行入去就聽到他的歌曲《不經不覺》，他興奮得即刻打電話給這歌的作曲人Eric Kwok（郭偉亮），他說：「佢話系咩？前排我又喺一個地方，又系聽到呢首歌，真系好特別，因為我同Eric冇諗過做呢首歌，系有一次喺泰國機場撞到，傾傾嚇話識咗咁多年，講咗咁多年，不如就做呢只歌，點知一個禮拜我同佢喺唔同地方都聽到呢首歌，感覺好奇怪，歌曲嘅緣分系解釋唔到嘅嘢，我仲要喺第二個國家聽到自己嘅歌，真系夠特別，我會永遠記得呢個moment，非常之難忘。」