繭團銀子齋田頭
話到崇明元宵節個吃，上子年紀個人十個里八個話繭團銀子。革是用米粉做成蠶繭、銀餅個樣子，屬於島浪廂正月半個傳統美食。
農曆正月十三四里，鄉下人城裡人都開始做繭團銀子，拿糯米粉挽勒面盆或者小缸里，加糖、熱水拌、搓，直到粉團變勒韌篤篤又勿答手。
崇明個村姑村婦，做繭團銀子都是老門檻，揪一小個粉團勒手裡，一歇歇變成子兩頭大中間細個繭團，勿多一歇，做子長煞一排。接下來做銀子，拿粉團搓成燒餅一樣個扁圓形，用酒杯底朝上面撳一記，出現一個圓圈，就成銀子特。
還要做稻籮、棉花蘿朵、杜米股頭，以及雞鴨眾生。稻籮做起來還算便當，搓成寶塔式，底里圍圓大點，頂浪小點。棉花蘿朵也勿難，樣子搓出來後，勒勒上面開四條縫，因為一個蘿朵開四囊棉花。做杜米股頭繁一點，關鍵是要看得出一粒粒杜米子，有點吃功夫。
做好子田裡長個，再做眾生，主要是家畜家禽像雞啦鴨啦豬啦。小囡也蠻高興湊鬧猛，我也做過個，記得姆媽是做一樣像一樣，我做子一隻雞一隻鴨，自己看看也笑出來，除了嘴巴尖勒扁個區別外，別個看勿出啥勿同。姆媽話，鴨個頸骨要長一點，身體要矮一點，雞個腳要高一點……我作姿作夠重新做，但不過仍然勿像樣，鴨頸骨太長太細，頭宕到腳跟頭要斷下來特，雞個腳一隻長一隻短，兩隻眼睛烏子一隻高低。
繭團銀子一道做好後，搬到烀糕墊浪，再端到鑊子里蒸。
小囡曉得有吃個特，候勒灶邊頭，歇歇問熟勒嘸熟，饞唾水直咽，熟子也總搶來先嘗嘗。我上中學個辰光正是三年困難時期，繭團圓子熟了也話嘗嘗，餓虎圇吞吃子一隻又一隻，結果吃脫九隻！
烀熟個繭團銀子等涼勒篩子里，明天要派大用場嘞——祭拜土地神，上下百沙俗話叫齋田頭，就是勒田頭祭拜土地神。
《崇明縣誌》里就是這樣記載的：農曆正月十五為元宵，下午齋田頭。土地生養萬物，長五穀養育百姓，傳說中個土地神，能保佑本鄉本土五穀豐登，六畜興旺。
崇明向來是農村，吃個著個都要靠地里長出來，種田人希望得到土地神個庇護，種下去保證有得收，還要好收成。故所以對土地神交關敬畏，叫伊土地老爺、田公公，年年正月半勿管好天落雨，總要到田裡齋田頭，拿繭團銀子撥田公公吃，保佑花利長勒好點。
正月半下半天，家家出動齋田頭，竹籃里拎著繭團銀子，去到自家田裡，在田邊擺一張矮凳，矮凳浪放一盆繭團銀子，請土地公公享用。
有些人家簡單點，繭團銀子插勒筷頭浪，再插勒地里，叫田公公吃。假使是稻田，筷頭浪插稻羅，如果種棉花，就插棉花蘿朵，種杜米的話，就插杜米股頭……
估計田公公已經吃飽了，就跽勒地上唱喏叩頭，嘴裡觸落觸落誠誠心心祈禱：「求田公公保佑，讓我俚多收點花利，吃勒飽點，著勒好點，多換點銅鈿銀子……」
上世紀五十年代地皮變子集體，齋田頭逐點少見。改革開放了，地皮重新回到戶頭浪，有汛人家又興正月半齋田頭特。
近年雖然大多數人家勿再齋田頭，但正月半吃繭團圓子個傳統，鎮浪鄉下都勒繼續。向化鎮每年個灶花節浪，都要舉行做繭團銀子個比賽，男女老少齊上陣，看啥人做勒像，花樣多，現場個人多來軋身勿開，嘩笑說笑鬧熱來拗去話伊！
更多精彩內容可點擊下方鏈接
新春工作首日，李強書記為何來崇明？
申崇線六線B線末班車延長一小時，這個舉措很溫暖！
明天起，這些新規將影響你的生活！
親子DIY、與小動物親密互動，來天鵝苑共度暖心好時光~
@所有正在搜集花燈做法的崇明家長盆友，這篇及時貼送給你！
交一個工作生活的幫手，開一扇了解崇明的窗口，多一條喜歡小島的理由
※讀懂這些跟冬季相關的崇明諺語，你將成為票圈裡最博學的人！
※沒機會到東灘看候鳥？這副牌帶你一鍵掃盲
TAG:上海崇明 |