古龍、三毛和倪匡
作者：蔡瀾（香港）
改編、朗讀：麥小姐
圖片來自網路
[由於公眾號平台讚賞功能規則有變化，如想打賞，可長按打賞碼（頁面下方倒數第2個二維碼），多謝朋友們對「麥唐作」的支持！]
[上海話改編]
差勿多十年前頭，我買過一本《蔡瀾談倪匡》，最近又重看了一遍。辣搿本書里向記錄了交關伊拉老朋友之間個有勁事體。其中有一篇叫《古龍、三毛和倪匡》個文章，因為古龍是我非常非常歡喜個作家，所以我想拿搿篇文章讀出來脫大家一道分享。
三十幾年以前，我辣台灣監製過一部叫《蕭十一郎》個電影。導演是徐增宏，主演是韋弘脫邢慧。電影改編自古龍個小說，買版權個辰光我就碰著過伊，講起來，我認得伊比認得倪匡還要早。
幾年以後我回香港定居，辣邵氏公司做製片經理，有老多劇本儕是倪匡兄寫個，乃末就幫伊熟了。
有一趟，阿拉三家頭儕辣台北，跑到古龍屋裡去茄山河，在場個還有一位小說家，伊叫三毛。
埃日夜裡，三毛著了一件露肩個衣裳，皮膚雪雪白，看了倪匡脫古龍儕屏勿牢迓迓叫跑到伊背後，1，2，3，兩個人一道辣伊個左右肩胛浪向啊嗚咬了一口。
三毛也是性情中人，伊勿但嘸沒動氣，反而哈哈大笑。
搿是古龍最上風個日腳。自家監製電影電視劇，寫作靈感也勿斷。住豪宅，帶保鏢，一副黑社會老大個腔調。
伊人生了又矮又胖，只頭特別大，差勿多有倪匡個一隻半，留了一簇小鬍子，但頭髮已經有眼禿了。
古龍講伊歡喜外國女人，乃末最近搿只電影里向就請了一個來，漂亮了勿得了。
三毛有點想勿通了，問伊：「阿哥啊，儂書里向從來嘸沒寫著過外國女人，請人家來演啥呢？」
古龍邊笑邊回答：「哈哈哈，反正儕是我想出來個，多兩個人又勿搭界個咾，再講，啥人敢勿撥我加啊！」
乃末我嘲古龍：「外國女人個模子儕介大，儂哪能吃得牢？用嘴巴咬啊？怪勿得噢，鬍子也留起來了喏。」
大家儕辣笑，古龍倒是一眼也嘸沒啥，端起杯滿滿個伏特加，朝喉嚨里一倒。搿就是古龍個風格，伊吃老酒從來勿是用「欱」個，伊歡喜「倒」，勿經過口腔直通腸胃，生活清爽！
國泰開始有直飛舊金山個航班了，要阿拉來拍特集，同行個人里向還有鄭裕玲、鍾麗緹脫李琦虹。倪匡兄也辣辣，伊開心了勿得了！
一歇歇，話題又轉到了三毛脫古龍。
倪兄感慨個講：「我幫三毛到台中去做講座，讀者來了七八千個人，三毛實在是忒受歡迎了。當天還有幾個比較文學個教授，聽伊拉個自我介紹，儕是名牌大學畢業個。乃末挨著我了，我難為情個講自家只有小學畢業。三毛人真箇是好，伊幫我解圍，對後頭個觀眾講伊自家連小學都嘸沒畢業。」
鄭裕玲問：「我聽講古龍是吃老酒吃煞脫個，到底是勿是真箇啊？」
倪匡回答伊：「也可以搿能講，我脫古龍一道吃老酒，常庄是一夜天吃脫幾瓶白蘭地，吃到第二日要去掛鹽水。不過，古龍跑脫個真正原因是，有趟伊到杏花閣吃老酒，一幫黑社會來叫伊去脫伊拉個老大敬酒。古龍勿肯。等伊走出酒家個辰光，撥了搿幫脫底棺材拿了又長又細個刀捅了好幾記，血是出得來行行情情。要緊送醫院，醫院個血庫也嘸沒介許多備貨，乃末嘸沒辦法，只好跟醫院外頭路邊浪個人買血，搿排人是啥人啦？儕是點白粉鬼呀！血勿清爽，結果弄著了肝炎。」
阿拉幾家頭儕聽了呆脫了。
倪兄繼續講下去：「肝浪個毛病照道理也是死勿脫個，不過醫生講再也勿好吃高度酒了，再吃個說話，就會昏迷，只要昏迷了三趟，也就一腳去了。所以啊，有辰光醫生個言話還是要聽聽個，乃末儂講古龍屏得牢[口伐]啦，管儂醫生講啥，老酒照吃。伊是覺著自家蠻狠個，但身體要撥儂顏色看唻。等我聽到伊第三趟昏迷個辰光，就曉得伊搿趟是凶多吉少了。」
倪匡停了一停，我接下去講：「古龍活辣蓋個辰光對一直死亡著迷，搿能介跑，我相信伊是情願個。」
倪兄也同意我個講法，伊還加了一句：「三毛也是。」
鄭裕玲講伊聽說三毛曾經自殺過好幾趟。
倪匡點點頭，「是個。古龍跑個辰光只有四十八歲，真是忒可惜了。」
挨下去，倪兄一本正經個脫阿拉講了一樁古龍死脫以後發生個怪事體：「大家儕曉得古龍歡喜吃老酒，阿拉幾個朋友就買了48瓶白蘭地，想囥了棺材裡撥伊『帶下去』。伊拉屋裡人幫伊換好了壽衣，就是埃種伊活辣海辰光寧可赤膊也不會穿個中裝，還用塊布頭拿伊只面孔蓋牢了。阿拉商量下來，既然古龍搿能歡喜吃老酒，索介阿拉就陪伊吃[口伐]。乃末，一手一腳拿搿幾十瓶白蘭地統統開脫了，每瓶意思意思吃個幾口。就辣搿個辰光，突然之間----」
「突然之間哪能啦？」阿拉聽了緊張煞脫了。
「突然之間，古龍嘴巴里開始大口大口個噴血了伊剛！」
「啊~」
「?講，人死脫介長辰光了，辣靈堂里也擺了多天了，哪能還會得噴血呢？搿明明就是伊嘸沒死嘛！阿拉要緊尋餐巾紙幫伊揩，勿曉得用脫了多少紙頭，我跟三毛儕覺著古龍還活辣海，但殯儀館個人硬勁要拿棺材板蓋起來，伊拉常怕還有啥更加妖怪個事體。我勿肯，一直搿牢只棺材，弄了自家一身個桐油。」
「葛末，結果呢？」
「結果殯儀館喊了醫生過來，醫生也證明古龍確實是死脫了。唉，乃末阿拉嘸沒辦法，只好挺伊拉拿蓋頭蓋上去了。」
故事結束，幾位在場個女士儕嚇了言話也講勿出了。為了讓氣氛輕鬆點，我存心開玩笑個講：「啥人叫?蹲辣古龍面前吃老酒個啦，伊介歡喜酒，又吃勿著，呴也呴煞了，殼張覅吐血唻！」
倪匡兄點點頭，連聲講「有道理，有道理」，像真箇相信了一樣。
[原文見下圖]
【麥唐作】即「麥小姐」和「唐廠長」的作品，是以滬語（語音口音偏上海市區音；文本表達參照錢乃榮《上海話大詞典》及《上海話小詞典》）為主打的原創方言專欄。文體、形式自由不羈，力求「做得開心，聽得滿意」。
「麥唐作」又取「賣糖粥」之諧音，願為眾友獻上一份帶著生活回甘的「地氣美食」。
【申情申音】本欄目以滬語朗讀為主打，文字來源可原創，也可選取其他老師的優秀文章進行適度改編（盡量取得原作者的授意，如暫未能及時聯絡得上，也將尊重其原文著作）。
申音悠悠，好文共賞。
本公眾號發布內容（包括音頻及未註明「來源」的文字、圖片）皆為原創，作者保留對作品的著作權。未經授權允許，不得擅自轉載。
非常感謝何東先生和何予西同學、陶嵩飛同學，為「麥唐作」公眾號製作、演唱片尾曲。
如有需要轉載或其他工作邀約：
多謝您的支持和歡喜！
TAG:麥唐作 |