《如懿傳》首播撼《延禧攻略》，周迅被批鵝公喉！

兩部內地劇集《如懿傳》同《延禧攻略》尋晚正式打對台，中港台成千上萬嘅劇迷真系好唔得閑，煲完一部又一部之餘，仲要做埋花生友，批評嚇首播嘅《如》劇，當然有彈有贊，平分春色！

當中最大花生亮點，就系話《如》嘅服裝同布景等等，同《延》相比下爭一大截。一開場霍建華喺紫禁城跑，網民話以為孔雀喺度跑呀，事關佢件衫又藍又綠！另外，43歲嘅周迅喺《如》劇中一開頭要由17歲少女演起，劇組可能為咗幫佢逆齡，佢每次出場時，條頸都會綁住條又紫又綠嘅巾，有網民形容好似女童軍！

此外，周迅把聲出名低沉，今次佢親自配音，但就有正反兩極反應。有網友話頂唔住佢把聲太低，甚至覺得太沙，但同時又有唔少網友話部劇全靠周迅把聲，話佢齋靠把聲已經勁有戲味，嘩！把聲都識演戲？而內地女星謝娜都有支持佢，喺微博留言：「有很多女生從小就不是小細嗓，很特別啊！」

當然周迅個樣都一樣被批，有啲話唔應該畀太多大頭Shot，又懷疑劇組做咗手腳，搞到佢個樣好有「玻尿酸feel」，但又有網民話佢以前系劇集收視保證，仲使乜靠樣！

論好戲，當然系相隔三十年再度合作嘅陳冲同鄔君梅，當年佢哋系電影《末代皇帝》已經交過手，堅系宮廷劇始祖。陳冲今次喺《如》飾演周迅姑媽，鄔君梅就飾演太后，一場講數嘅戲份唔少網友大讚。

喜歡這篇文章嗎？立刻分享出去讓更多人知道吧！