前TVB新聞小花轉投亞視合作新節目，撼娘家…

娛樂 09-06

雖然不死亞視喺重新開台後，多次傳出裁員，不過佢哋依然有炮製新節目，嚟緊除咗會舉行亞姐之外，仲搵咗前大台主播周嘉儀同黃紫盈，以及一前無線藝人吳雲甫，聯同一姐朱慧珊主持節目《香港追擊搜》，與當年嘅《今日睇真啲》形式接近，將會對撼無線嘅《東張西望》。

朱慧珊、周嘉儀、黃紫盈、吳雲甫、丘雅雯、馮家俊同麥晴茵等人，喺亞視總台出席記者會，宣布呢個節目將會喺於10月1號以live嘅形式推出。

周嘉儀同黃紫盈兩位都系前新聞之花，佢哋接受訪問時話以前喺大台曾經同期共事，離開大台在公開場合經常碰過，對於今次佢哋轉戰亞視，周嘉儀話：「拍攝進行都好專業，其實分別唔大，無論監製同marketing方面都好有交帶合作愉快。」黃紫盈就笑稱：「好開心，分別唔大，依家網路媒體世界，合作上好快上手。」薪酬方面？黃紫盈話：「有誠意合作，開心過以前。」周嘉儀就話：「錢唔系主要，我好耐都冇見人，呢個新嘗試系開心滿意期待順利。」

朱慧珊休息完再投入工作，佢透露節目系追擊社會熱話，唔會全部新聞性，所以要搵好多網料。珊姐之前同亞視簽咗一年約，亞視經常傳出動蕩，珊姐話：「我都冇去研究咁多，要做好亞視的確系唔容易，最緊要老闆系有心同埋支持，唔擔心工作出路問題，一心希望亞視好。」