遭FYY鐵粉圍堵，庄思明反擊：發表都唔得，不如毒啞我啦！

娛樂 09-16

馮盈盈喺大台節目《後生仔傾嚇偈》，話港姐嫁有錢人就會被人指係「公廁」或「做X」，師姐庄思明覺得有損港姐形象，咁講「好cheap」。（港姐冠軍又亂噏！嫁有錢人就是「公廁」、「J女」？前輩怒斥好Cheap！）

件事仲有餘波，麥明詩已經喺ig反問﹕「何謂cheap也？」直線抽擊庄思明，一班疑似係FFY嘅鐵粉都群起圍插思明巧多事，搞到男友楊明要係「瓊姐」ig替女友解圍，最後連自己都俾人鬧埋。楊明留言﹕「冇人鬧過佢(FFY)喎，係你哋不停鬧緊一個回應自己感受嘅人咋喎！你哋太偏激！」有網友駁斥﹕「我都好心痛，10年前開始支持你(楊明)......雖然明白你係想維護女朋友......但佢公開話馮盈盈嘅言論係博出位。」

庄思明今日亦有喺ig story寫咗一段文字俾所有Haters﹕「......你們不容許別人有其他想法，你們會想盡辦法用最毒的字眼去傷害那個不認同你的人！這種思維很恐怖，但我不會畏懼！」

思明今日再回復傳媒坦言好唔開心，因為有人問睇法，當時只係講自己感受，由始至終係覺得「公廁」、「做X」喺節目上講唔太恰當，係講件事，唔係講人，結果搞到自己成為被攻擊對象。佢話﹕「我剛啱去到馬拉，媽媽生日，自己噚晚都唔開心到瞓唔著。由始至終只係講自己感受，唔啱聽緊要，或者你哋喜歡支持單一面冇所謂，但唔好因為一隻字『Cheap』，就人身攻擊我，咁邊個膚淺呢？！我只係發表個人感覺，連發表一件事都唔可以，不如毒啞我啦！」

講到麥明詩ig留言，思明亦有點深深不忿﹕「唔該搞清楚件事，佢識我咩人，應該知我唔係咁嘅人，但我回應完又俾人話對號，不過算啦，我都覺得煩。」對於事件連累男友楊明，思明都好心痛﹕「佢係想保護我，佢咁俾人講我都唔開心，但有啲嘢真係冇道理可言，只有硬食，鬧到斷氣為止，唔係點。」