斷背？送花？阿佘憑《延禧攻略》在大陸爆紅全是因為她？

娛樂 10-05

今年43歲的佘詩曼事業就好暢順，最近更憑大陸宮廷劇《延禧攻略》，事業更上一層樓。但係感情方面，自從08年同鄭嘉穎傳緋聞後，近年阿佘都未有對象。

近日就有周刊報道指，阿佘自從兩年前離開無線，自組工作室，搵咗同性密友陳早茵做經理人，陳早茵貼身照顧阿佘，報道更指陳早茵同阿佘過從甚密，話佢有「近水樓台」之意喎！

陳早茵就係陳欣健個女，05年曾與韓君婷傳出斷背情，今次報道話陳早茵極力慫恿阿佘開工作室，佢就做埋阿佘嘅經理人，協助阿佘進軍大陸市場，報道指，今次阿佘憑《延禧攻略》喺大陸爆紅，陳早茵都要記一功。

知情人士話，阿佘初頭唔想接《延禧》，因為佢覺得自己唔係做女主角，又要做奸角，加上劇種類似《金枝慾孽》，原本就諗住推咗去，但陳早茵就遊說阿佘要接呢套劇，最後亦不負佢望，套劇令到阿佘喺大陸爆紅，阿佘自然對陳早茵加曬分。報道仲話，過去兩年陳早茵陪住阿佘走南闖北，陪伴在側，知情者仲爆料話，陳早茵會投阿佘所好，又送花，明眼人都會睇出佢心意，然而知情者就話阿佘只鐘意男仔，唔會變攣喎！

昨日阿佘又再同經理人陳早茵出埠，佢就特登喺社交網度貼出同陳早茵嘅合照，阿佘亦對斷背傳言作出回應，佢咁話：「她是我的經理人@陳早茵Joanne 、我的戰友、我超級好的朋友。不要作無謂的揣測。。完。。」阿佘直接解釋咗，咁大家就真係唔好再作無謂揣測喇！