張繼聰半夜私訊周秀娜李佳芯怕攞視後畀人鬧楊盼盼出院後新相曝光

娛樂 10-16

愛不釋手

愛不釋手新城唱好音樂大派對

李克勤

00:00/03:26

今日快報

同王子拍拖首過生日！35歲鄧麗欣冧爆嗌感動

藝人鄧麗欣（Stephy）今日35歲生日，亦系佢同男友邱勝翊（王子）拍拖首次過嘅生日，王子當然要為女友花盡心思先得啦！壽星女Stephy喺社交網就上載咗一張非常精緻嘅蛋糕，蛋糕上放滿朱古力馬卡龍，簡直靚到爆！Stephy仲留言：「感謝大家的祝福！我都收到了！感謝一切的安排，開心感動生日，蛋糕很美，蠟燭很特別。」

而王子則喺網上曬出一個透明氣球入面有個「S」字代表「Stephy」，並留言：「Hope you like all these arrangements！Happy birthday to you（希望你鍾意呢個安排，生日快樂！）」雖然佢哋冇曬出合照，不過網民就話喺Stephy張蛋糕照片中，捧著蛋糕嗰個一定系王子，仲話唔知道王子送上咩驚喜畀佢呢？

名導黃嘉威風化案今提訊　控方指再多三名受害者

舞台劇導演及演員黃嘉威於2013年至2016年間涉嫌誘未成年少女拍裸照，以及要求女方為他口交並拍下影片，黃被控一項向年齡在16歲以下的兒童作出猥褻行為罪及一項製作兒童色情物品罪。

案件在西九龍裁判法院提訊，被告黃嘉威，37歲，今日穿著白色長袖恤衫被押上庭應訊，肚腩凸起，雙手放在背部，一臉愁容，他無需答辯，聽取控罪後點頭表示明白內容。控方指再有多三名受害人，有可能再加控，申請將案件押後八星期，以便警方搜集資料及繼續調查。黃的代表律師要求將八星期縮短至四星期，但遭拒絕，案件將於12月10日再審，被告沒有申請保釋，繼續還柙。

大頭仔再遇浩南！吳彥祖孖霆鋒合照獲勁贊

娛樂圈兩大型男終於聚首！男神吳彥祖今日喺社交網上載一張同謝霆鋒嘅合照，粉絲即刻話啲回憶返曬嚟。事關兩位曾經合作過唔少電影，包括佢哋合作嘅第一套電影《新古惑仔之少年激斗篇》，吳彥祖仲話拍呢套戲時，霆鋒得17歲，自己就23歲：「喺希臘，呢個系瘋狂嘅三天。我因為謝霆鋒呢個老友而嚟到呢度做佢個烹飪旅遊節目嘉賓。我哋因為合作電影《新古惑仔之少年激斗篇》而認識，呢套亦系我第二部戲。當時我哋只系小朋友。佢17歲，我23歲。」

吳彥祖續話兩人之後有繼續合作：「我哋後來又繼續喺《特警新人類》上合作，幾年後再次喺《新警察故事》合作。距離我哋第一次見面，到今日系21年後，我哋喺希臘重新團聚，不止談論食物同建築，仲講到每個人從男孩到男人嘅演變，將我哋嘅生活故事融入我哋嘅工作中系好好嘅事，你哋覺得我哋系時候製作另一套《特警新人類》嗎？」粉絲睇見當然即刻留言贊成，仲問點解相隔21年，佢哋都仲系咁型？仲多咗份男人味添！

友情價開婚後P　陳展鵬拖單文柔放閃

藝人陳展鵬及太太單文柔新婚不久，今晚在中環補搞新婚派對，招呼圈中朋友玩一晚。穿西裝的展鵬與穿紅色低胸裝的Phoebe拖手到埗，現場下著毛毛雨，兩人逼在檐篷下受訪。

問Phoebe是否習慣被叫陳太？她說：「都系一、兩日，唔系好慣，都OK開心。（喺屋企叫慣老公老婆未？）都系叫英文名多啲。（婚後有咩改變？）暫時未覺得，但人哋叫我陳太，我就諗起自己有另一個身份，要學做人妻。（點做？）要再努力啲照顧佢。」陳展鵬說：「都系名啫！做番自己，舒服就OK，朋友尊重先叫佢陳太。（你試過陳太嘅手勢未？）佢OK呀！之前喺《美女廚房》都試過，菜式多到數唔曬，不過就煲湯多啲。」

問到今晚請了哪些朋友同事？展鵬表示已發了訊息給朋友，再叫大家廣傳開去，又贊自己今晚搞party的決定是明智：「我以前好多時都答唔到去唔去到飲，所以搞party就causal好多，台前幕後可以嚟一陣就走，唔使畀人情坐足全晚。而且之前搞婚宴，雙方家長都想低調。（不醉無歸？）我唔叻飲，但可以試嚇，好耐冇醉過，不過聽日Phoebe要開工，都系點到即止。」問到為甚麼揀選胡杏兒老公Phil開的餐廳搞party？展鵬表示一向有跟Phil飲嘢，選擇在此開P會更方便及有友情價。

楊盼盼燒傷出院後新相曝光　右手仍包紗布但精神好

現年60歲武打女星楊盼盼，上個月中喺馬來西亞拍攝賀歲片《大地回春》時，因為發生火災意外而導致臉部二度燒傷，手同腳都燒傷，被送去醫院救治。喺大馬留院半個月後，盼盼姐本月初已經出院返咗香港。

盼盼姐喺社交網留言話：「感謝愛我疼我的好人兒，希望戲裡的公公婆婆們快點康復！我也在努力把自己恢復原有的體質，希望繼續迎接新挑戰！每天也為你們念經，求大家身心安康！」佢仲貼咗一張今年4月佢個女Jessica幫佢影嘅相。不過，喺盼盼姐Instagram嘅story，就放咗張佢最新嘅照片，見佢一手抱住個B女同阿女Jessica合照，盼盼姐雖然右手仲包住紗布，但精神相當好。

媒體聯絡Jessica，原來個B女系盼盼姐契細佬孔祥德(新加坡演員)個女，Jessica話媽咪出院之後冇停過，今日先至飛去外地修行，又話嚟緊媽咪又會忙《歡樂滿東華》同埋traning studio嘅電影動作課程，真系好精力。Jessica又話:「《大地回春》男主角Cedric都有每日同媽咪聯絡，仲提醒我去買鹽水畀媽咪洗傷口，好有心。」

李佳芯怕攞視後畀人鬧：換獎唔馨香！

李佳芯（Ali）盛裝出席活動，戴上一頂鮮紅色的華麗帽飾現身的Ali，稱很少機會可以戴這類型帽飾，平時戴帽都偏向簡單款，亦試過在歐洲遇到一頂很合心的帽，就算花了3000多元都捨得買，不過至今都未遇上合適場面，加上亦未搵到一套合襯服飾。

笑陳炳全唔識投資

講到儲帽及包包，Ali坦言她喜歡儲錢多點，她人生最大目標是置業。講到樓價跌是入市時機？Ali謂：「身邊人都咁同我講，不過自己就覺得再睇定啲先。（你男友陳炳全講？）陳生？唔系佢。（咁生疏？）咁全哥囉，呢方面我實際過佢，佢冇乜數字概念。（你幫佢管數囉！）我哋呢個階段又未使住，以前阿媽教將來老公搵10蚊要畀9蚊老婆，我可以8蚊嘅。」不過，Ali指男友不是亂花錢的人，只是不會投資保值方面。

否認為爭獎而煞停婚事

講到有傳因為視後獎項而煞停兩人婚事？Ali即笑言：「首先我自己都唔知有婚事，其次公司畀唔畀獎我都冇人知，獎呢樣嘢唔系換番嚟，換得到都唔馨香，要實至名歸、值得攞先攞，唔想攞完畀人鬧。」同是視後大熱的陳煒亦睇好Ali？Ali謂：「煒哥人太好，佢亦都系我前輩。（競敵？）呢啲好主觀，其實《深宮計》同我套《BB來了》入面嘅角色系完全唔同，兩套劇系完全唔一樣嘅嘢，所以好難去比較，自己都會平常心去睇獎項，唔諗咁多。」

作死！張繼聰自爆三更半夜私訊周秀娜

藝人周秀娜和張繼聰到尖沙咀出席電影《女皇撞到正》首映，周秀娜獲安排戴上價值2百萬元的后冠。接受訪問時，周秀娜表示戴后冠心情興奮，笑言似足香港小姐，阿聰叫她即場買起后冠，她說：「你送？」阿聰說：「Ok！有冇折頭？」

友誼邁進一大步

阿聰表示拍攝這套電影很開心，大家都付出很多，周秀娜說：「拍嗰陣我哋都幾煩，成日夜麻麻搵導演傾偈。」問有否半夜致電阿聰？阿聰代答：「半夜message囉！都明目張胆！大家咁多位演員都溝通好好，友誼邁進咗一大步，今次同周秀娜合作好開心，我進步咗好多喇！以前只系企佢後面，今次好多對手戲，雖然戲入面佢都系唔騷我。（對票房有冇信心？）儘力啦！之後有謝票，落力宣傳。」周秀娜表示近日都像check股票般睇實優先場的走勢，幸好反應不俗。問到會否包場請朋友欣賞？阿聰說：「可以！叫曬啲朋友！帶埋個仔去，呢套啱佢睇！」

合約糾紛唔想搞成咁

講到跟舊經理人公司的合約糾紛，周秀娜說：「搞到咁都唔系我哋希望嘅處理方式，但依家好多嘢都畀咗律師處理，始終系多年咁好嘅夥伴，都系朋友，希望將來尋求到一個對大家都冇傷害性嘅合作方式。（覺得失望？）其實咩關係都系講信任，其他嘢唔方便再講。」