馬德鍾獲送10圍酒賀攞視帝　譚凱琪被贊最好戲　薛凱琪被追問姻緣

娛樂 01-10

今日快報

上車為娶老婆？黃建東認有圈外人了解中

藝人黃建東出席電影《The Pool鱷口逃生》首映，對於日前被拍得與母親睇樓，問到是否有意置業？東東不諱言當日差點撲槌落訂：「我再上去睇多次，唔使400萬有200幾呎實用面積好難得，但話曬50年樓齡，需要好多錢維修，所以都仲諗緊，朋友就話個樓市會再跌，叫我唔好買住。」

首期方面，東東表示打從小一開始儲錢，至今已有成30年，問到是否近日很多工作，令其荷包腫脹？他說：「都OK！我好抵用，我儲錢OK，著嘅衫平時都系大減價先至買。（買樓系咪要娶老婆？）等我處理好自己先，但近排的確有認識嘅異性。」更指對方乃圈外人，現時互相了解中。

鄭敬基孖老婆夫妻裝放閃

藝人鄭敬基（Joe）和太太麥曉安（Angie）喜歡以「夫妻look」放閃示人，呢日出席電影首映禮，兩人又再次襯到絕，戴上唔同顏色畫家帽及格Llook現身，Joe稱「夫妻look」是結婚後的一種情趣，好鼓勵朋友都倣效。而Angie就笑言可以多個借口買新衫。問到婚後仍有初戀感覺？Angie甜到漏說：「日日都有。」而Joe表示太太剛成功親手做了一件番梘，是她看書自學的首件製成品。問到可會製作兩人的愛情結晶品？Angie則笑言：「暫時未有呢個打算，反而想領養多一隻狗仔。」

被薛家燕追問姻緣　薛凱琪尷尬唔識答

藝人薛家燕、薛凱琪、黃致豪、傅嘉莉與堪輿學家李丞責在西貢拍攝無線賀年節目《新春開運王》。薛家燕指聽聞今年旺木，她笑稱與「妹妹」薛凱琪也會很旺。薛家燕指師傅贈言今年會更旺及驛馬星動，她除了到內地、星馬、美加巡迴演出，還會到非洲做義工。

薛家燕被問到可希望抱孫？她笑說：「冇咁快，佢哋有自己嘅計劃，呢啲嘢唔催得，我諗下年啦。」可希望女兒石佑珊快點出嫁？她笑說：「師傅話唔使幫佢買桃花，減少佢嘅工作就得，即系減少我嘅工作。但系王梓軒今年好多工作喎，我意思系珊珊系佢經理人吖嘛，哈哈。」

薛凱琪獲贈言桃花旺，她認為做藝人要有桃花運，因代表有觀眾緣，愛情方面她則希望有姻緣。薛家燕則笑問還未遇到嗎？薛凱琪笑說：「我即刻唔識點答，慢慢，順其自然。」薛家燕提點不要太高要求，?男人最重要是對方有責任心。薛凱琪則說：「你同我Daddy講嘅一樣，同埋最緊要專一。」薛凱琪去年拍了不少內地真人騷及綜藝節目，她覺得工作能帶給別人快樂是一種功德，今年希望能夠同時推出粵語及國語EP，滿足樂迷。薛家燕則笑說：「你講得好啱，所以我都系功德無量。」

蕭正楠曬翠如靚湯　阿廉唔抵得：小心有毒

蕭正楠與黃翠如結婚後，不時網上曬愛放閃，繼阿蕭之前曬自己炮製給愛妻的雞翼煎蛋飯後，翠如呢位「人妻」都做番啲嘢，見老公呢排日拍夜拍，煲咗個下火的節瓜鹹蛋肉片湯畀佢，阿蕭當然冧到暈，仲喺社交網站上載靚湯相，更滾動留言謂：「唔通今日系我生日？定系我做得善事多？返到屋企竟然有湯飲？」好多人即刻留言大讚翠如之際，「二奶」曹永廉即留言：「小心有毒！」跟住不少網民寸曹永廉話：「好一個進擊的小三啊！」又有人指阿廉「呷醋」，認真笑爆，而洪永城都有加入戰團，佢問蕭正楠會唔會系發緊夢諗多咗？網民乘機向佢催婚，叫佢快啲結婚就會有呢啲福利！

網民贊「天嬌」最好戲　譚凱琪嗌估唔到

藝人譚凱琪（Zoie）憑劇集《大帥哥》中飾演「天嬌」一角而大獲網民好評，被不少網民大讚在三位女主角之中最好戲，對此，Zoie謙稱：「三個人嘅角色發揮唔一樣，我個角色嘅變化比較多，其實個個都演得好好。我初時接到劇本，都會諗個角色咁衰，其中要玩艾妞（楊秀惠），我都預咗會畀人鬧，但好多人反而集中咗我嘅演技，好開心。」另外，Zoie現拍攝《飛虎之雷霆極戰》，她稱在戲中又是飾演反派：「做反派都幾開心，因為以前畀人感覺好少講嘢，說話又陰聲細氣，唔似做反派，依家可以擴闊嚇戲路都唔錯。」

2018年大豐收！馬德鍾獲送10圍酒賀攞視帝

藝人馬德鍾、張曦雯、劉佩玥、陳瀅、何廣沛與無線高層曾勵珍等，在尖沙咀筵開八席為劇集《跳躍生命線》舉行慶功宴，慶祝劇集在台慶頒獎禮成為大贏家囊括七個獎項，包括「最佳劇集」、「最佳男主角」、「飛躍進步男藝員」等。馬德鍾指今晚可說是他請客，因有朋友贊助，他說：「朋友每年都講話攞獎就送兩圍畀我慶祝，講咗好多年都攞唔到，今年終於攞到視帝，劇集又勇奪最佳劇集，所以朋友就話送10圍賀我。」他又直言最好的禮物就是於2018年大豐收。問到《跳》會否開拍續集，他說：「未具體傾，睇公司安排。（今年再拍無線劇？）都未有具體方向，最重要系睇劇本同時間。」