馬國明撩李佳芯　恬妞拍新劇遇上岳華離世　洪永城火速認愛女友受寵若驚

娛樂 01-20

今日快報

攞獎後密密做！曾樂彤歌影視三棲發展

歌手曾樂彤出席運動品牌活動，繼之前在頒獎禮奪得新人獎後，她透露亦獲串流平台頒發「年度新人獎」，她說：「好開心，嚟緊都會捉緊機會努力，啲人都話新人第二年會難行啲，咁我都好彩有啲品牌同廣告，都會Keep住繼續合作。（有咩策略去行第二年嘅路？）嚟緊都陸續有作品推出，除咗歌，都有拍劇同電影。」問到攞獎後可有多了工作？她說：「都有多咗啲活動，好開心。（咁今年咪可以豬籠入水過年？）希望啦，依家系足夠，知足，多或少都開心。」

被Inbox問價！工藤佑采爆粗舉中指嬲到震

黑面黑出星途來嘅落選港姐工藤佑采，網上言詞一向尖峰火辣，曾先後狂寸庄思明、黃心穎、無線等，點知又畀佢寸到獲網友瘋狂洗版撐，真系估你唔到！眼見佢破壞力驚人，不過都仲有人大膽挑機，今次就有不知名網友喺社交網Inbox佢，仲……仲開到聲問價，呢個舉動，果然成功辣?咗工藤佑采！

工藤佑采二話不說直接公開對方賬號同二人對話，冇打格無遮無掩畀大家一覽無遺，對話內容就見到對方先用英文問佢有冇需要接Job，跟住再用中文問多次佢有冇興趣賺外快，更開出$5000，面對咁嘅侮辱工藤佑采即刻爆粗回佢：「Fxxx oxx」同大便emoji，點知對方再開出$7000，又話只系約出嚟飲嘢，工藤佑采問佢話唔明對方指嘅「外快」系咩，跟手再整多個舉中指Gif回敬，最後對方就用日文答佢多謝就結束對話。

面對咁嘅騷擾，工藤佑采嬲到震發文話：「任何人唔好再發無聊信息畀我！如果你提出性交易，咁我會報警！」唔少網友都贊佢做得好，今次仲輪到佢可以出嚟「鞭人屍」，女仔遇到網上騷擾真系要出聲！

方媛安胎勁親民　曬自拍有問必答

天王郭富城去年年底宣布太太方媛（Moka）再度有喜，早前更被東網影到Moka肚凸凸出巡，同媽咪行街買衫。專心安胎嘅Moka，似乎悶悶哋，今日喺社交網曬兩張自拍並留言：「好久沒給自己自拍了。」佢仲話自己依然咁貪靚呀！相中見Moka仲系面尖尖，少少水腫都冇，仲舉起個V字手勢好有少女心。而Moka亦好親民，幾乎遂一回應網友問題，真系好Nice呀！

姐夫岳華離世　恬妞為撐林敏驄照拍喜劇

藝人林敏驄首部自編自導的賀歲片《如珠如寶》，早前聯同片中演員恬妞接受香港開電視節目分享拍攝感受，已十多年沒有接拍港產片的恬妞，特別感謝阿驄給予機會。阿驄笑說：「我自細已經系恬姐嘅粉絲，恬姐19歲就成為影后。今次有機會喺旁邊欣賞恬姐自成一派獨有嘅演技。」而他亦於該片邀請到一班在80年代電影界最輝煌時期的演員演出，當中包括洪金寶、林雪、泰迪羅賓等與現在的年輕一輩演員在戲中較量，擦出火花！

談到恬妞於拍攝期間遇上姐夫岳華離世，她說：「這些事我曾經歷過兩次，一部是阿驄的戲，另一部在兩年前，兩部戲恰巧都是喜劇，在當時拍攝的時候是難以笑得出來。」她也稱不論是得過多少次影后或影帝獎項的藝人，於該些情況下亦難以過度悲傷心情，故很感激阿驄當時十分保護她，令她能專心拍戲。

洪永城火速認愛　梁諾妍受寵若驚

洪永城（Tony）早前被踢爆秘戀長腿女模梁諾妍（Inez），Tony即大方認愛，Inez接受訪問時表示與男友拍拖幾個月，沒想過這麼快公開：「諗住大家再了解多啲先公開，所以見到記者嗰時系嚇親，有啲手足無措，不過佢好保護我，（佢贊你有好多優點！）我都受寵若驚，多謝佢，佢都系好細心嘅人，（佢為你買樓準備同你結婚？）唔係為我，佢投資啫，系樓花嚟。」

她表示大家以工作行先，目前關係好好，正常發展中，雖然Tony忙於拍劇，但兩人有保持電話聯絡。講到跟男友跑步而認識，跑開馬拉松的她說：「佢都有跑，但跑一個鍾度，我依家努力push佢跑多一個鍾，希望呢一、兩年內佢陪我跑嚇馬拉松。」談到她與前度一齊時似乎與Tony重疊時間，她說：「冇重疊，好清楚我哋系和平分手後，我先同Tony了解相處。」

當黃心穎冇到！馬國明撩李佳芯返屋企

藝人馬國明及李佳芯到九龍塘出席賀年活動，席間馬國明向司儀說：「我會圍住屋企棵桃花行幾百個圈，3歲就開始要桃花運嘞。」

事後二人受訪，記者問蜜運中的馬國明是否還要「行桃花運」？他笑答：「梗系要啦，桃花代表人緣嘛，況且我媽咪每年都買，呢行梗系想多啲人鍾意自己，戲裡面可以擁有多啲靚女。（現實生活呢？）都可以嘅！」

李佳芯聞言即謂：「畀你（馬國明）講到我都想開始擺桃花，人緣好似青春咁，唔可以畀佢流失。（咁你要搵馬太幫手喎。）但我凈系得一個馬太嘅電話（指馬國明女友黃心穎）！」馬國明聞言回道：「你講緊馬德鐘太太？」

問到馬國明豬年會否計劃迎娶「馬太」，他笑謂：「冇喎，搵嚇錢先啦，我系無線最窮嘅，使費好大，要養父母。（儲定老婆本？）錢有儲，冇話系咪老婆本，不過我依家諗緊同家姐夾份買樓，貪佢個首置優惠。」李佳芯即笑言要搵馬家姐學投資：「我都唔會同佢（男友陳炳銓）夾份，1人1層攞曬兩個優惠。」馬國明即介面：「要搵我阿媽，又要搵我家姐，咁你上我屋企拜年嘞！」